Nu corazziere mancatu

Ticia sempre ca iddhru hia bbutu ffare lu corazzieri.

-Lu corazziere, nonno? -

- Si,perce`? Nu mme mancava quasi nienti ... tenia l'altezza ( 1 ,92 ) ,la presenza e la fedina penale pulita ... ma,nc'era nu ma ... me mmancava menzu ticiatu crossu te la manu taritta -

- E com'ete ca te mmancava ? Cce tia successu ? -

- Eh fija mia , li tiempi te quandu me era carusu , nu nn' erane comu quisti te moi. Nu nc'era tuttu stu benessere, le famije teniane tante ucche te sfamare e lu mangiare scarciciava ... allora quandu te ssettavi a n'taula , li pisieddhri, li pasuli o le fave ,'nsomma quiddhru ca nc 'era nc'era , lu mintiane intru a nu piattu crande te criddhra smaltata o te latta e mangiavame tutti te ddhrai. Lu cchiu spertu mangiava te cchiui e lu cchiu lentu se rranciava. Jo era spertu e nu rimania mai mortu te fame . Fratuma lu picciccu, nu giurnu ca tenia cchiu mmuta fame , cu se sbrica,pe sbaju ,me ' mpizzau la furcina intru allu ticiatu crossu . Foe cusì ca me vinne infezzione ,l' antibiotici nu esistiane e ttuccau cu me tajane menzu ticiatu . Me fici carusu e me rrivau la cartulina cu partu allu militare. Me mandara a Montefiascone , alli Granatieri te Sardegna. Erame tutti giovanotti erti , ma me era nu picca cchiu ertu te l'addhri. Lu capitano mia me ticia sempre ca ia pututu fare lu corazzieri ... peccatu pe ddhru ticiatu. Lu corazzieri nu lu fici,ma 'mparai cu cucinu bbonu, vistu ca lu compitu mia era te aiutu cuocu intra alla cucina te l'ufficiali. M'have sempre piaciutu cu cucinu e te lu sai bbonu ! -

- Si,nonnu, è vveru ... te nu ssai sulu cu cucini, si bbravu cu faci tuttu e se hivi fattu lu corazzieri ,eri statu lu meju te tutti !!!

Al mio grande nonno Nzino !